İqtisadiyyatın bir çox praktiki məsələləri ən yaxşı həllin tapılması ilə əlaqədardır. Məsələn, məhdud resursların optimal bölüşdürülməsi, nəqliyyat məsələsi, təqvim proqramlaşdırılması və başqa bir sıra iqtisadi məsələlər optimallaşdırma üsulları vasitəsilə öz həllini tapır. Belə tip məsələlərin həll edilməsi üçün riyaziyyat elmindən, o cümlədən, optimallaşdırma üsullarından geniş istifadə edilir. İqtisadi problemlərinin həllində instrument kimi istifadə edilən bir sıra riyazi üsullar riyazi modelləşdirmə kursunda öyrənilir. Son illərdə iqtisadiyyatda tətbiq edilən klassik riyazi modelləşdirmə üsulları ilə yanaşı, digər instrumental üsullar da yaradılmışdır. Məsələn, qeyri-səlis çoxluqlar nəzəriyyəsi, qeyri-səlis məntiq, neyron şəbəkələrin iqtisadiyyatda tətbiqi genişlənmişdir.